Rúgbrauð og vorlaukurinn endalausi

Ég er búin að vera að baka í alla í nótt....þannig séð.  Ég setti rúgbrauðið í ofninn um 9 leytið í gærkvöldi og tók það út kl 7 í morgun.

En viljiði fyrst sjá hvað vorlaukurinn hefur vaxið mikið á einni viku? Sá til vinstri var jafn lítll og þessi til hægri, og þessi til hægri var orðin jafn stór og sá til vinstri, ég var að klippa af honum til að nota...

 

 

 

Rúgbrauð

• 375 g rúgmjöl
• 125 g heilhveiti
• 2 tsk matarsódi
• 2 tsk salt
• 1/2 l AB mjólk
• 325 ml síróp

 

Öllu hrært saman. Deigið var fremur blautt.  Ég setti það í Ikea pottinn mitt sem er úr steypujárni og glerhúðaður að innan.  

 

Ég var ekki viss um hvort það myndi klessast við pottinn þannig að ég setti smá bökunarpappír inn í pottinn.

Bakaði í ofni við 100°c í 10 klst.   

Svo er auðvitað hægt að nota mjólkurfernur eða kökubox. 

 Brauðið heppnaðist mjög vel og smakkaðist eins og seytt rúgbrauð :)

 

Ég er ekki mikið fyrir rúgbrauð í morgunmat, en þetta er frábært með léttum hádegis brunch. Mmmmm, rúgbrauð með kæfu og agúrku eða steiktu eggi.  Og best af öllu, með plokkfiski.

 

Flatkökur

Ég var að lesa á umbúðir á flatkökum sem fást út í búð en röð innihalds fer eftir magni og á öllum pökkum sem ég hef lesið er alltaf meir af einhverskonar hveiti en rúgmjöli. Ein innihaldslýsing var hveiti, haframjöl, rúgmjöl. Fjallagrasaflatkökur innihalda ekkert rúgmjöl.

Það er mjög mismunandi innihaldslýsingar á flatkökupökkum eftir framleiðanda þannig að endilega lesið á umbúðirnar til að vita hvað þið eruð að versla.

Allar uppskriftir að flatkökum sem ég hef lesið innihalda mest af rúgmjöli þannig að ég gerði bara ráð fyrir að mest væri af rúgmjöli í þessum út í búð, en það útskýrir hvers vegna flatkökurnar út í búð eru "mýkri". Ég fann það þegar ég var að laga hlutföllin hjá mér að þær urðu viðráðanlegri ef meira var af hveiti, ég nota heilhveiti.

Ég hef þróað mig áfram með hlutföll og þær eru mýkri ef maður notar annað hveiti með rúgmjölinu. Flatkökurnar mínar innihalda þó alltaf meir af rúgmjöli en öðru mjöli.

Eini gallinn við flatkökugerð er að það kemur svo mikill reykur hjá mér þegar ég byrja að baka þær.  Það verður því ljúft þegar það kemur gott veður næst að skella sér út á hlað með litla sumarbústaðarofninn og henda í nokkrar flatkökur. Það mætti líka setja þær á grillið.

Á Brauðbrunni má sjá frábært video sem sýnir flatkökugerð.  Ása Ketilsdóttir er greinilega búin að mastera flatkökugerð en hún notar eingöngu rúgmjöl en fletur það svo út með hveiti.  

Það væri gaman að prófa uppskriftina hennar Ásu og nota natrón, smá sykur og salt.   

Það er með flatkökur eins og margar aðrar uppskriftir, engar tvær eru eins.  Ég sagði ykkur frá uppskriftinni í bókinni Matarást ekki alls fyrir löngu og hún er ágæt,  en hún hljómar svona:

Flatkökur

• 200 g rúgmjöl
• 100 g heilhveiti
• 2 1/2 dl sjóðandi vatn
• 1/2 tsk lyftiduft

Blandið öllu vel saman, og vatninu smám saman þar til þið eruð komin með gott deig.  Kannski þarf aðeins meir af vatni. 

Skiptið því niður í kúlur sem þið rúllið út í flatar kökur.  Pikkið í þær með gaffli.

Eldið á heitri pönnu (t.d pönnukökupönnu) eða hreinni hellu.  Bakist í ca eina mín á hvorri hlið.

Setjið kökurnar ofan í skál með smá vatni í og svo í plastpoka eða geymið þær í blautu viskastykki, það er svo að þær þorni ekki.  Þegar þið hafið bakað þær allar geymast þær í plastpoka.

Vorlaukurinn endalausi

Nú þurfiði bara að kaupa vorlauk einu sinni og aldrei aftur...stórsparnaður í því :)

Þegar þið hafið notað vorlaukin sem þið keyptuð skiljið þá eftir hvíta partinn á endanum með rótunum og skellið þeim í vatn.  Svo klippið þið bara ofan af honum eftir þörfum.

 

Á nokkrum dögum verður laukurinn búinn að vaxa um góða 5 cm. Hann vex mjög hratt. Ég skipti út vatninu á lauknum reglulega, nánast daglega.  Það er lítil fyrirhöfn þar sem ég er í eldhúsinu oftar en ekki.

Sama er svo hægt að gera við hvítlauk og svo má stinga honum í mold.  Ég byrjaði á að setja eitt rif í staupglas og fljótlega var farið að vaxa hvítlauksgras sem gott er að klippa niður og krydda með mat.

 

 

 

HVERNIG Á AÐ VERSLA Í STÓRMARKAÐI? - Eplakaka - 4 hráefni! AÐEINS FJÖGUR

Það var nokkuð gott sem Michael Pollan talaði um í einni bókinni sinni um hvernig stórmarkaðir eru byggðir upp.  Og sú lýsing smellpassar við stórmarkaðina hér á Íslandi.

Ég man ekki nákvæmlega hvernig hann orðaði þetta en málið er að versla "hringinn í kringum búðina", allt sem er meðfram útveggjum búðarinnar því þar staðsetja þeir ferskmetið, mat sem hefur ekki hillulíf upp á marga mánuði.

Ef ég skoða t.d hvernig Krónan er uppbyggð þá stemmir þetta.  Maður byrjar á fersku grænmeti og ávöxtum, færir sig svo í fiskinn og kjötið.  Því næst tekur við egg og mjólkurvörur. 

En þá er þetta líka komið.  Svo fer maður "inn í búðina" einstaka sinnum til að ná sér í hreinlætisvörur, hveiti og sykur og annað hráefni sem geymist í "búrinu" hjá manni. 

Annað sem er í hillurekkunum og frystikistum eru meir og minna unnar vöru, þessar fersku eru meðfram allri búðinni.  Og þar á maður að versla.

HEIMABAKAÐ ER BEZT 

Þessi kaka var of einföld til að prófa hana ekki.  Hún hvarf liggur við um leið og hún kom úr ofninum.

Það er hægt að bera hana fram með ís (munið bara að nota heimagerða ísinn...) eða rjóma, en hún svínvirkar líka svona ein og sér, og nei ég stráði engum kanil eða sykri ofan á hana.  Það var ekki í uppskriftinni.

Hveiti, sykur, egg, epli...kviss bamm búmm. Ég mæli algjörlega með þesari næst þegar ykkur vantar eitthvað maul með kaffinu.

Ég var að maula á því litla sem var eftir nú daginn eftir og hún var alveg jafn góð og í gær, mjúk og fín.  Þannig að það væri hægt að henda í hana að kvöldi til og koma svo með hana í vinnuna dagin eftir handa vinnufélögum næst þegar að þið eigið að sjá um bakkelsi.  

 

Einföld eplakaka

• 1 1/3 bolli hveiti 
• 1 bolli sykur 
• 3 egg
• 3 epli

Afhýðið og skerið eplin í  bita.  

Þeytið saman eggjum og sykri með rafmagnsþeytara í ca 2 mín.

Bætið við hveitinu í skálina og hrærið með trésleif (eða plastsleif) Ég notaði sleif og það tók ekki meir en mínútu að blanda þessu vel saman. (Það á semsagt ekki að hræra hveitinu saman við með rafmagnsþeytara).

Setjið eplin í kökuform sem hefur verið smurt að innan og hellið deiginu yfir eplin.

Bakið í ofni við 200°c í 5 mín.  Lækkið þá hitann niður í 180°c og bakið í 30 mín, eða þar til kakan verður gullinbrún.

Það er búið að vera svo yndislegt að fylgjast með nátturunni vakna til lífsins í sveitinni.  Maður vaknaði sjálfur til lífisins nú þegar það fór að hlýna aðeins og maður gat verið úti að sinna vorverkunum.  Á heimimleið keyrðum við fram hjá einu túninu þar sem kálfarnir voru að taka sín fyrstu skref, á næsta túni voru það folöldin og síðsast en ekki síst voru litlu lömbin nýkomin í heiminn. 

 

Má maður vera væmin í friði og nei ég ætla sko ekki að koma með uppskrift af Lambakássu núna :)

Heimalagaður ís án eggja með appelsínu og rommbragði - HEIMAGERT ER BEZT

Ég ákvað að gera ís án eggja.  Þetta er enn ein afurðin sem maður á að gera sjálfur frekar en kaupa tilbúið út í búð með allskonar aukaefnum.  Á meðan ég var að frysta hann og hræra aðeins í honum stalst ég í skeið og skeið og á meðan hann var enn dálítið linur smakkaðist hann nákvæmlega eins og sjeik út í ísbúð. 

Það er endalaust hægt að bragðbæta grunnuppskrift af vanilluís.  Ég notaði heimagerðu vanillurommdropana mína og kreisti safa úr ofboðslega góðri appelsínu sem ég keypti hjá Frú Laugu.  Usss usss usss...Þessi ís er bara á mörkum þess að vera hollur, hefði ég ekki notað í hann sykur, en það er víst sykurinn sem gerir hann að þessum dásamlega ís... 

 

Ís með appelsínu og rommbragði

• 1/2 L rjómi
• 2,5 dl mjólk
• 1,8 dl sykur eða hrásykur (mætti nota aðeins minna finnst mér)
• 1 fersk vanillustöng
• 1 tsk vanilludropar eða heimagerðir vanillu rommdropar

Bragðefni: 

• Safi úr 1-2 appelsínum
• 2 msk romm 
• 100 g fínt rifinn súkkulaðispænir úr 70% almennilegu súkkulaði 

 

Það þarf ekki að nota romm og það er hægt að hafa þetta með hvaða bragði sem ykkur dettur í hug eða gera einfaldlega vanilluís án bragðefna, það er líka gott.

Hitið saman 2 dl rjóma og sykur á meðalhita þar til sykurinn bráðnar. Skrapið baunirnar úr vanillunni og setjið í pottinn ásamt vanillustönginni, sem þið veiðið svo upp úr áður en ísinn fer í frysti.

Takið pottinn af hitanum og bætið við restinni af rjómanum, mjólkinni og vanilludropum.

Kælið ísblönduna í 8 klst eða yfir nótt í formi sem þolir frysti.

Fjarlægið vanillustöngina og frystið, ef þið viljið búa til kristalla í ísinn þá er gott að hræra íhann upp öðru hvoru á meðan hann er að frjósa. Svo er hægt að nota ísvél fyrir þá sem það eiga.

Það tók mig innan við hálftíma að gera ísinn klárann í ísskápinn.  

Ég mun nota ögn minna af sykri næst, þetta varð frekar sætur ís.  En samt mjög góður ef þið viljið hafa hann sætan. 

 

HEIMAGERT ER BEZT 

Hráefnið í þessum ís er mjög ferskt.  Það má sleppa vanilludropum og rommi til að hafa þetta sem hreinast og bragðbæta með ferskum lífrænt ræktuðum ávöxtum eins og t.d appelsínum hjá Frú Laugu sem koma frá Sikiley. 

 

Hrökkbrauð - HEIMAGERT ER BEZT

HEIMAGERT ER BEZT

Næstu færslur verða svolítið litaðar af "Heimagert er bezt".  Ég er svolítið að hugsa upphátt í þessum færslum.  Ég er mikið búin að vera að elda eins og ég get frá grunni og pæla mikið í hráefnisnotkun og hvaðan hráefnið kemur.  Ég hef sniðgengið tilbúin mat í langan tíma, ég kaupi aldrei frosin tilbúin mat og nánast aldrei krukku eða pakkamat.   

Síðasta árið hef ég farið skrefinu lengra og gert meir og minna allt sem ég get sjálf, það bætist sífellt við listann hlutir sem ég geri sjálf.  Það er seint hægt að segja að það sé sparnaður í því.  Því miður er það oftast dýrara að gera hlutina sjálfur frá grunni, nema kannski það sem inniheldur bara hveiti, vatn og egg eins og ýmis brauð, núðlur og pasta.

En það er samt þess virði.  Maður gerir sér betur grein fyrir því sem maður lætur ofan í sig, maður er laus við MSG og önnur óæskileg efni.  Sykurmagninu stjórnar maður sjálfur!  Það er stór plús miðað við hvað allt er orðið dísætt.  Fyrir utan það að mér finnst gaman að elda og spá og spekúlera í hráefni.

Ég er þó ekki í einhverju sem í dag telst til heilsufæðis, því ég baka, nota hvítt hveiti og sykur. Þetta er bara venjulegur matur, en hann er heimagerður og þá er maður líka laus við mikinn óþverra, og fyrir vikið borða ég einfaldari mat og mikið af fersku grænmeti.

Stundum getur þetta verið tímafrekt, en ekki alltaf. Mér finnst þeim tíma vel varið sem ég eyði í eldhúsinu í að gera góðan mat fyrir fjölskylduna.  (Mér finnst skemmtileg hugmyndin um  ítölsku húsmóðurina í litlum falleg bæ sem er alltaf í eldhúsinu með fullt af fersku grænmeti frá markaðinum og nýtíndum sítrónum, svo ilmandi ferskum og tómatsósan hennar með kjötbollunum  sú besta í þorpinu. Þið sjáið hana kannski fyrir ykkur).

Hér er listi yfir nokkra hluti sem dettur í hug að svo stöddu sem auðvelt er að gera sjálfur og smakkast svo vel heimagert.

• Pasta
• Asískar núðlur
• Brauð
• Sultur
• Ís
• Kex
• Thai sweet chili sósu
• Tómatsósa
• Granola bar 
• Musli
• Kjötfars
• Fiskfars
• Tortilla kökur
• Kínverskar kökur
• Vorrúllur (og deigið)
• Osta
• Smjör
• Jógúrt
• Kæfur

 

Ég er búin að lesa margar hrökkbrauðsuppskriftir, hlutföllin eru yfirleitt svipuð, sumir nota rúgmjöl, aðrir spelt eða hveiti, yfirleitt er notað haframjöl og svo nokkrir dl af fræjum.  Einhverjir nota dl af olíu, aðrir bara matskeið.  

Sumir baka í langan tíma við lágan hita, aðrir hærri hita í styttri tíma. 

Ég átti ekki rúgmjöl en átti spelt þannig að ég notaði það.  Næst ætla ég að nota rúgmjöl og minna af fræjum. 

 

Hrökkbrauð

• 2 dl Spelthveiti (eða venjulegt, eða rúgmjöl)
• 1 dl haframjöl
• 2 dl fræ (5 korna blanda, graskersfræ og sólblómafræ)
• 1 tsk Maldon salt
• 4 msk matarolía
• 1 dl vatn

 

Öllu hrært saman.  Smurt út á bökunarpappír á ofnplötu.  Ég flatti þetta bara út með bakinu á skeið en það er líka hægt að leggja bökunarpappír ofan á deigið og fletja út með kökukefli.  Potið í þær með gaffli, 

Ég hafði mínar frekar þunnar, en ekkert of.

Ég bakaði þær í 30 mín við 170°c.  Svo slökkti ég á ofninum en tók þær ekki út strax.  Þær voru þó alveg full bakaðar eftir þessar 30 mín.  

 

Uppskrift af sænsku hrökkbrauði  sem gaman væri að prófa er:

 

• 1 1/3 bolli rúgmjöl
• 3/4 tsk sykur
• 1/4 tsk salt
• 4 msk smjör
• 1/3 bolli mjólk

 

(1 bolli er 2,4 d) Öllu blandað saman í matvinnsluvél, nema mjólk.  Svo bætið þið við mjólkinni og fáið gott deig, fletjið það út og skerið í ferninga, stingið á það göt og bakið í ofni  við ca 170 í 10 -15 mín. 

Myntu og melónusalat - Kona kærir Nutella, hélt að súkkulaðihnetusmjörið væri hollt

"Ég stóð mig að því um daginn að kaupa Svala af því að tveggja ára dóttir mín vildi fá appelsínu með augu og munn að spila á gítar. "

Það var kona í Bandaríkjunum, en ekki hvar, að lögsækja Nutella.  Hún var búin að vera að gefa fjögurra ára dóttur sinni Nutella súkkulaðihnetusmjörið í morgunmat haldandi það eftir að hafa séð auglýsingu frá þeim að þetta væri hollt.  Ætli hún fari ekki svo á MCdonalds til að gefa dóttur sinni kjöt með kartöflum og sósu í kvöldmat.

Í alvöru?  Og ekki bara það heldur vann hún málið.  Ég hef ekki kynnt mér lagalega hlið málsins en skil ekki hvernig henni tókst að vinna mál, þar sem það fer ekki milli mála á innihaldslýsingu krukkunnar að þetta er ekki hollt.  Fyrir utan það, síðan hvenær er unnin súkkulaðivara holl hvað þá vara framleidd af sælgætisfyrirtæki (Ferrero)?

Hér fann ég smá klausu um málið ásamt auglýsingunni, sem er með engu móti villandi.  Þarna talar móðirin um hvernig hún geti fengið börnin sín til að borða morgunmat, ekkert um að það sé hollur morgunmatur.

En þetta er víst svona í Ameríku.  Margt fólk tekur enga ábyrgð á sjálfu sér og lætur mata sig af endalausri markaðsetningu án þess að hugsa.

Þetta er kannski skárra hér á Íslandi en samt til staðar.  Ég stóð mig að því um daginn að kaupa Svala af því að tveggja ára dóttir mín vildi fá appelsínu með augu og munn að spila á gítar.  Hún hafði í sjálfu sér engan áhuga á innihaldinu en umbúðirnar heilluðu miklu meira en umbúðirnar á Trópí, sem er mun betri vara.  Þetta geri ég ekki aftur, að láta fyrirtæki sem selur bölvaða óhollustu í krakkavænum umbúðum stjórna mér, ....hvað þá að láta krakkann stjórna mér svona. :)

Hér er mynd sem útskýrir afhverju mér finnst Trópí betri en Svali, og fyrir utan sykurmagnið í Svala þá eru það öll gerviefnin, sýrur, bragðefni og ég tala nú ekki um aspartam.  

Svo eru örugglega einhverjir sem gefa börnunum sínum Skólajógúrt eða Engjaþykkni og halda að það sé hollt. 

En næg predikun um hvað sé hollt og hvað ekki.  Það verður hver og einn að vera í stíl við sjálfan sig.  Á mínu heimili er ekki drukkið gos og ekki keyptur svali eða aðrir gerfiefnadrykkir.  Ég kaupi Appelsínutrópí, og meir að segja þennan dýrari sem er framleiddur úr appelsínusafa en ekki þykkni. 

Að sjálfsögðu stefni ég að því að kreista minn eigin appelsínusafa úr appelsínunum hjá Frú Laugu, eingöngu... :) 

Ef ykkur langar í ferskt salat þá er þetta málið.  Það verður vart ferskara.  Þrátt fyrir óhefðbundin hráefni þá passar þetta svo vel með ýmsum mat.  Meir að segja pizzu.

 

Myntu og vatnsmelónu salat

• Vatnsmelóna
• Mynta
• Hreinn fetaostur
• Góð ólífuolía
• Salt eftir smekk

Skerið melónu í ferninga, svona litla munnbita, skerið fetaostinn í litla ferninga eða mjög litla bita, hálfgerða mylsnu, mér finnst það mjög gott.  Saxið myntuna fremur fínt.  Blandið öllu vel saman í skál og dreypið smá ólífuolíu yfir (en bara ef hún er bragðgóð og alvöru).  Saltið ef þið viljið og þá bara eftir smekk.

Leyndardómar kókóskúlunnar

Ein af fáum uppskriftum sem ekki er hægt að nálgast svo auðveldlega eru kókóskúlur, svona eins og maður fær í bakaríinu.  Einn sem ég þekki gaf mér upp með hið leynilega hráefni kókóskúlunnar sem gera kúlunar að því sem þær eru.  Og  það útskýrði líka afhverju þetta er ekki á almanna rómi.

Vínabrauðsafgangar og snúðar og annar bakarísmatur er skafinn upp úr gólfinu og hent í degið sagði hann.  Eins og ein orðaði það þá, " Kókóskúlur eru sem sagt pulsur bakarísins".  

Það er kannski ofsögum sagt að hráefnið sé skafið upp úr gólfinu, ég held að mér hafi verið sagt þetta meira í gríni en hugmyndin var sú að mauka afganga eins og af gömlum vínarbrauðum og öðru sætabrauði sem selst ekki eða er afskurður og annað og nota í kókóskúlur.  Er það fjarri lagi?  Gæti þetta verið hið leynilega hráefni?

Ég finn hvergi uppskrift sem gæti orðið eitthvað eins og bakarís kókóskúlur.  Og forðið mér frá uppskriftinni sem maður notaði sem barn, flórsykur, haframjöl, kakó....

Ég bjó til kókóskúlur um helgina.  Þær voru góðar, runnu út eins og kaldar kókóskúlur, ég rétt náði að mynda 3 síðustu.

En þær voru samt ekki eins og það sem mig langar að ná fram.  Í alvöru, það vantaði tveggja daga gamla vínarbrauðið.

 

Góðar kókóskúlur, en ekki þessar einu sönnu...

 

• 2-3 msk smjör
• 2-3 msk mjólk
• 120 - 200 g 70% súkkulaði, suðusúkkulaði  eða annað gott  súkkulaði
• 1 msk kakó
• 1 tsk vanilludropar
• 2 msk romm
• 300 g marsípan
• 3-4 dl haframjöl
• 2-3 dl kókós
• 3-4 msk flórsykur

 

Hitið saman í potti smjör, mjólk, súkkulaði, kakó og vanilludropa aþr til súkkulaðið er bráðnað..  Bætið út í í lokin smá rommi.

Setjið marsípan, haframjöl, kókós og flórsykur í matvinnsluvél.  Hellið vökvanum saman við og mixið vel saman.

Ég setti aðeins of mikið af mjólk þannig að deigið mitt var mjöööög blautt.  Ég vildi ómögulega setja meira haframjöl þannig að ég endaði á að nota deigið svona mjúkt og velti því upp úr kókósmjöli um leið og ég mótaði úr því kúlur.  ÞAð virkaði mjög vel.

ÞANNIG AÐ.... ef ykkur finnst deigið ykkur of mjúkt, örvæntið ekki, leyfið því vera þannig að notið kókósmjöl til að rúlla því í kúlur.  Þegar þær fara svo í ísskáp þá harðna þær.

Eins og þið sjáið þá er uppskriftin ekki mjög nákvæm, ég gerði bara eitthvað, byrjaði á að velja hráefnið sem ég vildi nota og setti svo smá að þessi og smá að hinu og svo aðeins meir af þessu, þar til ég var komin með eitthvað sem smakkaðist ágætlega. Ég á eflaust eftir að leika mér með þessa uppskrift til að reyna að gera hana enn betri.

Ef einhver lumar á góðri "bakarís" kókóskúluuppskrift  þá má hinn sami gjarnan deila henni með okkur hinum : )

Heimagerðir vanilludropar

Ég fann svo skemmtilega uppskrift að heimagerðum vanilludropum.  Eins og svo margt sem maður getur gert sjálfur þá er þetta mjög einfalt.  Næsta tækifærisgjöf jafnvel?

Það sem þarf er krukka, vanillustangir og dökkt romm. 

 

Vanilludropar

• Krukka (hrein sultukrukka) sem rúmar 2.5 dl.
• 5 vanillustangir
• 2.5 dl romm

Sótthreinsið krukkurnar með sjóðandi vatni.

Kljúfið vanillustangirnar svo við sjáum vanillubaunirnar, en ekki skafa baunirnar úr.  Skerið stangirnar til helminga eða í fernt

 

Setjið stangirnar í krukkuna. Fyllið krukkuna af rommi, passið að rommið nái upp fyrir vanillustangirnar.

Skrúfið svo lokið vel á. 

Hristið krukkuna vel.

Merkið með dagsetningu.  Geymist á köldum, dimmum stað í allt að 6 vikur.

Flóknara var það ekki.  Þetta verður svo sterkara og því betra með tímanum.  Passið að rommið nái ávalt upp fyrir vanillustangirnar (þess vegna jafnvel betra að skera í fernt.) Þegar stangirnar eru farnar að standa upp fyrir þá má fjarlægja þær. (Eða bæta við smá rommi ef þið notið þetta mikið).

Ég fann þessa uppskrift hér, en þetta er mjög skemmtilegt matarblogg með fullt af fínum uppskriftum.

Það sem ég hef eldað úr bókinni hans Jamie Oliver, Kokkur án klæða

Hér hef ég safnað saman þeim uppskriftum sem ég hef eldað upp úr bókinni Nakti kokkurinn.  Markmiðið er að elda þær allar til að detta inn á nýja hluti.

Það hef ég gert nú þegar, t.d þegar ég komst að því hvað salvía og beikon er gott kombó og rauðrófu-tagliatelli er virkilega gott.  Ég get mælt með þessu öllu, sérstaklega hörpudisknum.

 

Hörpudiskur með salvíu, beikoni og puy baunum

 

Kjúklingabaunasúpa með blaðlauk

 

Rauðrófu-tagliatelle með pestó, kræklingum og hvítvíni

 

Minn fullkomni steikti kjúklingur

 

Risotto með pancetta og rósmarín

Daginn eftir gerði ég hádegismat úr afgöngum af Risotto og kjúklingnum og reif kjúklinginn niður og steikti á pönnu með risottóinu, það var svo ljúfengt, eiginlega betra en dinnerinn daginn áður. 

 

Svo er ekki úr vegi að minnast á hvað maður var að gera fyrir ári síðan....

Gleðilegan 1. maí!

 

1.maí 2011